[size=32]السلام عليكم ورحمة الله وبركاته ..اتمنى الجميع يكون بخير ...اشكركم جميعا على الردود للي اسعدتني
[/size][size=32]
بارت 5
**
**
**
انقهرت منه : حتى عيالك يبغون ملابس و
قاطعها بعصبية : وبعدين معك ؟!
وش رأيك اصرف الفلوس وأجلس أشحد
علشان حضرتك تتفشخرين !!
وبسخريه : خلي عمي ابو راكان يعطيك فلوس !
ام عمار بقهر : والله أبوي وش دخله يصرف على عيالك !
خلف طنشها وطلع وتكلم وهو طالع : لو أجلس دقيقه الا تفلسيني !!
طلع من البيت وهو يكلم نفسه : وش هالناس هذي ؟!
كل ما تشوفني هات هات عمرها ما قالت خذ !!!
الشاطر يبغى يكسب مني وكأني جالس على بنك !
شاف ساره جالسه بالحديقة اقترب منها وبطبيعه صوته الخشن : وين عمار ؟!
دق قلب ساره بخوف لما سمعت صوته رفعت نظرها له : راح مع سلمان
ضرب الأرض برجله بعصبية: وقته هالزفت يختفي !
وين انقلعوا ؟!
رفعت كتوفها بمعنى ما ادري !
طالعها بقهر وجلس جنبها : روحي على البقاله
تعرفينها؟!
وقفت بحماس : ايه اعرفها ؟!
طلع فلوس واعطاها علبة الدخان : جيبي نفس هذي العلبه
بسرعه لا تتأخرين فاهمه!
ابتسمت بحماس : ان شاء الله !
خلف وهو يجلس مكانها : خذي الباقي لك !
هزت رأسها وتوجهت ركض للبقاله بفرح
دخلتها وهي تبتسم اشترت ووقفت تنتظر يعطيها الباقي وهي تفكر وش تشتري بالباقي!!
ناظرها البائع :وش تبغين ؟!
ساره ناظرته : الباقي!
البائع : ما في باقي هذا سعره (...)
حست بالخيبه كيف قال لها الباقي لها ؟!! طلعت من البقالة وهي تحس بالخيبه !!
زفرت بضيق وهي تناظر علبة الدخان
حست بالرعب دب بقلبها لما شخص سحبها من ثوبها ووقفها تبغى تصرخ بس الخوف اخرسها
التفتت وسرعان ما تنهدت بارتياح لما شافته
هزها بعصبيه : وش هذا للي معك ؟!
ساره ناظرت العلبه وبسرعها حطتها خلف ظهرها
عزام بعصبية : هذي العلبه ليه معك ؟!
وجرها لداخل البيت وهو معصب طفله صغيره
ليه معها علبة الدخان ؟!
وقف خلف اول ما شافهم تقدم منهم : وش فيه؟!
عزام بغضب : الظاهر انها الحيوانه تبغى تتدخن ؟!
خلف بعصبيه،: وش تقول ؟!
وبسرعه انهل بالضرب عليها وبالشتائم !!
حاولت بكل قوتها تحمي وجهها
عزام ابعده عنها
وقرصها بكتفها : يا ويلك اذا شفت رجلك عتبت
البقاله !
زمت شفايفها تمنع البكاء ومدت لخلف العلبه
خلف فتح عيونه بتذكر وضحك ضحكه قصيره : ارسلتها تجيب لي دخان ونسيت
طالعه عزام بغضب يحس فعلا انه متخلف
وشخص ما يقدر يوصفه !!
يستغرب كيف جده زوج عمته ام عمار له !!
رجع نظره على ساره للي تتكلم مع خلف وصوتها مخنوق: البائع يقول ما في باقي !
خلف بضحكة قصيره: غبيه اي باقي ؟!
زم شفته بسخريه وتوجه لسيارته وغادر المكان
ناظرها وهي تمشي للداخل بهدوء زفر بضيق من الغباء للي فيه
ما حاولت تتدافع غن نفسها او تبرر موقفها
متأكد لو يأخذها للمستشفى الا يطلع عقلها ضارب!
زم شفته مو عاجبه وهو يشوفها تركض باتجاه جودي وتبتسم معها !!
مو كأنها قبل لحظات حصلت كم طراق !
المفروض الحين تبكي !!!
**
**
**
**
ساره وهي تكابر بالابتسامه : وين كنتي ؟!
جودي بغرور وهي تلعب بخصله من شعرها : في بيت جدي !
ساره بتساؤل : ليه ما اخذتوني معكم ؟!
جودي : لانه جدتي ام راكان ما تحبك !
ساره بابتسامة باهته : بس انا ما زعلتها !!
ليه ما تحبني؟!
جودي تركتها وراحت تركض بجهة ليان
زفرت بضيق ليه يزعلون منها هي ما عملت شيء
زمت شفتها وركضت للداخل بسرعه وخي تكس نفسها مخنوقه
**
**
**
ام عزام بلوم : ليه تضربها ؟!
عزام بقهر : قهرني اخوك كيف يرسلها للبقاله ؟!
علشان تشتري له سم الهاري !
ام عزام بضيق : عيب عليك هذا خالك !
مط شفته ما عجبه : كله هالخال ما يدخل مخي !
هو واخته ما ادري من وين جايبينها ؟!!
استغفرت ام عزام بصوت عالي
وقف عزام : اروح اقابل كتبي احسن !
وعفس ملامحه وهو يشوفها دخلت وهي تركض. وفرحانه
ام عزام ابتسمت لها : هلا بساره !
ساره وهي تلهث اخذت نفس وابتسمت بطفوله : خالتي تقول لك خالتي ام عمار تعالي اجلسي بالحديقه !
عزام باستغراب : الحين جايه ومبسوطه علشان كذا ؟!-
هزت رأسها بابتسامه : ايه
وناظرت ام عزام : جوالك مقفل !
ام عزام : قولي لها الحين تيجي !
نطت بفرح لقدوم ام عزام وسألت بطفوله :وين سلمان وعبد الرحمن ؟!
عزام دفها بقرف : يا مخلوقه بالله طيري من خلقتي !
ساره ببراءه ابتسمت: ما اعرف اطير ؟!
تفكرني عصفور اطير ؟!!
عزام وهو يمسك جواله : الا قولي بومه !
وتركهم وطلع !
ناظرت ام عزام بابتسامة غريبه وهزت كتوفها بطفوله
!!!
**
**
**
**
بعد مرور شهر
دخلت عند ام عمار بابتسامة : خالتي نظفت الحوش !
ام عمار ابتسمت لها: شطوره !
ساره بحماس : ونظفت عن جودي المطبخ حرام تعبانه !!!
ام عمار ما تبغاها تكون هبلة : وليه تنظفين عن جودي !!
ساره ابتسمت بحنيه : حرام تعبانه
ام عمار مطت شفتها : ولا فيها شيء
بس تمثل عليك يا الخبلة !
لفت نظرها صوره معلقة على الحائط اول مره تشوفها تقدمت بخطوات بطيئه وسألت وهي رافعه اصبعها : من هذا ؟!
ام عمار ناظرت الصوره وابتسمت بحزن : هذا ابوك الله يرحمه !!
لفت رأسها لأم عمار وناظرتها بصدمه : ابوي!!
ام عمار هزت رأسها بالموافقة وطلعت من الغرفه
وهي تسمع ليان تنادي عليها !
رجعت ناظرت الصوره بصدمه اقتربت اكثر وهي تتدقق بالصوره
وهي مو قادره تصدق او تستوعب !
هذا الشايب ابوها !!
رجال كبير كبير مو قادره تتخيل إنه ابوها !!
إذا كان ابوها كذا أكيد امها عجوز مثله !
هزت رأسها بالرفض دوم تتخيل امها وابوها صغار
مثل ام عائشه وابوها !
هي صغيره وهذا الشايب ابوها !
جلست على الارض وهي تناظر الصوره عقلها رافض
يصدق هالكلام !
ليه هي الوحيده ابوها شايب !
ليه ما عندها اب وام مثل البنات ؟!
الخيبه خيمت عليها
وقفت على حيلها لما سمعت عمار ينادي عليها
ناظرته نظره اخيره قبل ما تطلع وهمست بعدم تصديق : ابوي !!
وطلعت من الغرفه وهي تركض تبغى تنسى الشيء للي سمعته !
عمار مسكها من اذنها : ليه تأخرتي ؟!
ساره بتبرير : لما سمعتك جيت
قاطعها : خلاص خلاص
اسمعي بسرعه روحي للبقاله واشتري لي
قاطعته : واذا شافني عزام ؟
عمار بحده : قولي له عمار يقول لك ما يخصك !
وش دخله يمنعك من البقاله ؟!
ساره هزت كتوفها ما تدري !
عمار ،: خذي الفلوس واشتري لي ....
هزت رأسها بطاعه وراحت تركض للبقاله !
ليان بضحكه : مين يصدق هذي عمتنا !!
عمار وهو يجلس بكسل : والله إنها أحسن منك
مطيعه وما تقول لي لا !
ليان تخصرت : هذا للي تبغاه مصلحتك !!
حاطها طرطوره لك !
عمار خزها بعيونه : مين للي يخليها تكمل شغلها
وهي جالسه !!
ليان : اصغر القوم خادمهم !!
وهي اصغر وحده بالبيت !
عمار بجلافه : خلاص انكتمي !
كشت عليه وتوجهت للغرفه عند جودي !
**
**
**
اشترت الاغراض وطلعت من البقاله وهي تتلفت حولها
تخاف يشوفها عزام
حست بالراحه لما وصلت باب البيت
دخلت بابتسامه واعطته الاغراض : تفضل !
ابتسم بسخريه: ما ادري على مين طالعه مؤدبه ومطيعه !
كل هالعائله نفسيات واولهم اخوك خلف
أخلاقه دايما مقفله ويطلع حرته فينا !
ساره ابتسمت له وجلست قباله على الكنبه !
عمار وهو يآكل خزها بعيونها : وش قصتك انت بالضبط ؟!
لما اشتري تجلسين قدامي علشان اعطيك ؟!
رجع يكمل اكل ويتكلم : لو تجلسين من هنا لباكر
ما رح اعطيك !
جودي دخلت وسمعته عفست ملامحها : ابخل منك ما شفت !!
عمار حمل اغراضه وبسخريه :طالع لابوك ههههه
جودي بقهر: يا كرهي له لما نشتري نعطيه
اما هو بخيل وطماع ..
وانت يا خبله لا تروحين تشترين له !
ساره : حرام مين يشتري هو !
جودي فقعت منها : غبيه غبيه خليه ينقلع هو !!
قومي جيبي لي كأس عصير نشفتي ريقي !
طالعتها باستغراب ليه معصبه وردت بهدوء :إن شاء الله !
**
**
**
**
نهى شدتها من شعرها : اقول لك روحي طلعي الزباله برااا
عائشه وهي تحاول تبعدها عن شعرها: تخسين!
نهى ولعت من عنادها : والله اقول لأمي !
عائشه فكت يد نهى وتخصرت : والله ما اطلعها !
وبغرور : انا ما احمل زباله !
ام سعود بحده : ليه صوتك طالع !
نهى بقهر : مو راضيه تطلع الزباله !
ام سعود بحده : ثلاث ثواني إذا ما طلعتي إلا
عائشة بقهر : ليه انا اطلعها !
ام سعود بحده : بدون اعتراض خلصيني !
ضربت رجلها بقوه واخذت وطلعت وهي مولعه من العصبيه وتبربر
حطتها بالحاويه ورجعت وعند الباب التقت مع أبوها تخصرت : عاجبك عاجبك اخر عمري اصير اجمع زباله !
ابو سعود ابتسم : ما فيها شيء !
فتحت عيونها باستنكار : لو شافتني وحده من صاحباتي !!
وش يقولون عني !
ابو سعود ابتسم : يا بابا المسلم يحافظ على نظافة بيته ويأخذ حسنات !
طالعته وهي رافعه حاجب : وللي يدخن وش يأخذ حسنات والا سيئات ؟!!
احتقن وجهه وصار احمر
هالبنت جالسه له على الكلمه !!
ابو سعود بغضب : كل يوم عليك ترمين الزباله
عقاب على طول لسانك !
حركت ملامحها باعتراض : انا وش قلت ؟!
ابو سعود بحزم : ولا كلمه !
زمت شفتها بقهر وغبن : يا ليتني ما شفتك عند الباب !
لو جلست عند الحاويه احسن لي
قاطعها بحده : بنت!!
ركضت للداخل وهي تبربر !!
**
**
**
**
**
ام عمار نادتها :،ساره !
ساره بسرعه توجهت لها : نعم !
ابتسمت وهي تتمنى بناتها مطيعات مثل ساره : ليه تلبسين ملابسك القديمه !
ساره ابتسمت : ما ابغى اوسخ ملابسي الجديده !
ام عمار ابتسمت على تفكيرها : عادي اشتري لك جديد !
اخوك محمد ارسل لك ملابس !
ابتسمت بهدوء اخوها وما تعرفه !
ام عمار تبغى تفرحها : ا لحين خلف على الطريق
!
ساره باستغراب وخجل : محمد أخوي يعرفني ؟!
ام عمار حزنت عليها : ايه ارسلت صورتك له !
ساره ابتسمت بخجل : وش قال عني ؟!
ام عمار تجاملها : اكيد قال عنك حلوه !
ساره فتحت عيونها بعدم تصديق : بس البنات هنا
يقولون اني مو حلوه !
ام عمار : لا تردي على احد !
انت احلى وحده !
ساره ابتسمت بألم: جدتي كانت تقول لي اني احلى وحده !
ام عمار مسحت على رأسها: البنات يغارن منك !
ساره باحباط: العيال يقولون اني مو حلوه !
وابتسمت تشجع نفسها : الابله قالت مو مهم الشكل
اهم شيء الخلق !
هزت رأسها ام عمار : صحيح اهم شيء الخلق !
لازم نتمثل بالأخلاق الحسنه !
ساره ابتسمت بانفعال : وما نشتم احد ونسامح الجميع !
ام عمار هزت رأسها وناظرت البوابه وهي عافسه ملامحه : هذا اخوك خلف جاء !
نزل من السياره وتقدمت تسلم عليه بفرح : السلام عليكم
خلف سلم عليها كالعاده مستعجل
ام عمار سلمت بهدوء : وين اغراض ساره ؟ !
خلف رفع حاجب :اي اغراض ؟!
ام عمار بقهر منه ومن تصرفاته : للي ارسلهن اخوك محمد !
حك راسه بتذكر : ايه ايه تذكرت
وناظر ساره : شفت بالطريق بنت ما معها ملابس واعطيتها الملابس !
زعلتي ؟!
ساره حست بالخيبه وابتسمت بخيبه : عادي !
ام عمار ولعت من كذبه : قول انك بعتهن !
خلف بحده : انت وش دخلك ؟!
ام عمار بقهر : مال يتيم مو من حقك !
خلف بعصبيه : وبعدين معك !
قسم بالله اني اقرف البيت لأجلك !
ام عمار بقرف : انا قرفت الدنيا كلها بسببك !
وتركته ودخلت البيت !
ناظر ساره : وش هالحرمةهذي ؟!
يا كرهي لها ؟!
جلس على الكرسي : روحي خلي الزفته ليان تعمل لي شاهي ؟ !
هزت رأسها بطاعه : ان شاء الله
استغرب رد فعلها يتذكر لما محمد مره ارسل هدايا لعياله وباعهن
وقتها ناموا وهم يبكون !
اما هذي عادي الوضع عندها سألها :- زعلتي علشان الملابس؟!
ناظرته بهدوء: ما زعلت لأنه يمكن البنت بحاجة
الملابس اكثر مني
وختمت كلامها بابتسامة طفوليه بريئه!
هز رأسه باستغراب: خلاص روحي
والمره الجايه اجيب لك غيرهم !
توسعت ابتسامتها بفرح وتوجهت للداخل بسرعه!!!
**
**
**
يتبع يوم الثلاثاء بإذن الله....دمتم بخير
[/size][size=32] [/size]