[size=32]
تمت الاجراءات واقفه ما تشعر بالفرح ولا كأنه الامر يهمها !
ما تدري معقول هذي اخر مره تدخل المحكمه !
متى تستقر وتعيش مثل باقي البنات ؟!!
مو قادره تستوعب عبدالله خطبها ؟!
وكيف وهو للي رفضها بالشوفه المره الاولى !
وش صار حتى يخطبها مره ثانيه ؟!
ممكن عمها ابو راكان غصبه عليها ؟!
الفرق بينهم كبير كيف تنازل وخطبها !!
معقول خالتها تدري ؟!
وش رد فعلها ؟!
رفعت نظرها لما وقف جنبها نادر وبهدوء كلمها : تعالي
ناظرت عبدالله للحظات ونزلت نظرها وهي مستغربه الابتسامه شاقه حلقه !
ليه مبسوط لذي الدرجه ؟!
عقلها مو قادر يستوعب !
تحس نفسها ما تستحق تكون له !
هي ما تناسبه !
بنظرها لازم يخطب فتاه مثل نوره !
على كلام سعديه شايب وكثير عليها !
توقعت تتزوج اعزب ومتعلم !
كل توقعاتها بالعريس القادم يكون شايب !
واذا تكرم عليها الشايب و وافق بعد ما يسمع عن حظها النحس !
زفرت بضيق وهي تناظر عمها واقف مع عبدالله !
مستغربه لما سلم عليها عمها ابو راكان كان مكشر والابتسامه لما سلم عليها بالغصب طلعها !
وش السبب ؟!!!
تحس في شيء ناقص مو قادره تربط الاحداث ببعضها !
**
**
وقف مع ابوه دقائق وبعدها توجه
لنادر وابتسم له : تفضلوا اوصلكم بطريقي !
نادر : ما نبغى نغلبك
قاطعه عبدالله : ما في غلبه يا رجال !
امشي وانا احس الارض مو واسعيتني من الفرح !
وكأني ملكت الدنيابمجرد ما كتبت الكتاب !
ناظرت للخلف وشتفها تمشي وعيونها بالارض ابعى اصرخ بأعلى صوتي وأقول قمر يا عالم !
والله إنها قمر كل شيء فيها جذاب وخاصة طولها !
ما انكر مشيتها ملفته للنظر وما تقرب للاناقه بشيء
ومع ذلك تعجبني بكل شيء !
ما ادري سبب لهفتي وكيف دخلت قلبي بهذي السرعه !
كل للي أعرفه مستحيل أفرط فيها
ولو على جثتي !!!
اول ما ركبت بالسياره بدأت أرحب فيهم
نزلت راسها باحراج مني !
يا جمال البنت الخجوله !
احلى ما فيها انها بسيطه
قاطعني نادر وهو يبتسم : حرك حرك كله كلام خطوبه !
بعد الزواج كل هالخرابيط تتطير !
ضحكت على كلامه : انا غير عن الكل !
مستحيل اتغير !
قاطعني رنين الجوال ابتسمت وانا اشوف رقم امي كل شوي تتصل فيني وتتطمئن علي
رديت انا ابتسم : هلا والله ....والله بخير ....ما صار علي شيء ...ههههه تعوذي من الشيطان ......يصير خير ....مع السلامه !
***
***
***
ام راكان قفلت الخط وهي تبكي : يا خوفي عليك يا ولدي !
ام محمد بخبث : جنيتي على ولدك !
لو وقفتي ومنعتيه من هالزواج !
زوجتيه وكأنك ما تدرين عن نحاستها !
يا حسرتي عليك يا عبدالله بعدك بعز شبابك !
زاد بكي ام راكان من كلامها وهي تحس خلاص فقدت ولدها وبأي لحظه يوصلها خبره!
ام عزام بنرفزه : يمه وبعدين مع هالكلام ؟!!
ما يصير !
ام محمد الغيره والقهر ذبحها وهي تشوف ساره تملك على عبدالله !
ما رح تتركها تتهنى فيه !
ورح تكمل انتقامها منها من بعيد لبعيد وبكره تكلمت : وين صارت هذي ارمله مرتين تتزوج واحد بعز شبابه واعزب !
عبدالله تناسبه بنت فهمانه واعيه متعلمه وفوق هذا تكون حلوه مو جوكر مقرفه بشعه !
ام عزام هزت راسها بفقدان امل من سوالف امها : حرام عليك والله انها
قاطعتها ام محمد : بلاك ما تشوفين وجهها كله حبوب وكآنه كله حصى !،
ام عمار : هذي الحبوب فتره وتعدي
لانها بفتره مراهقه !
ام راكان والحزن كله مخيم فوق راسها خايفه على عبدالله !
ما تقدر تتحمل فكره فقدانه !
***
***
***
**
جالس ويناظر الخرابه للي ساكنها نادر
وهو مستغرب كيف حال وضع عيال عمه !
فرق شاسع بينهم !
ما ينكر انه ما يحب عيال عمه ولا يعترف فيهم !
بس ساره غير من اول مره شافها !
ابتسم لما دخلت لابسه عبايتها ومعها القهوه
وخدودها اكتست باللون الاحمر من الخجل : السلام
رحب فيها : هلا والله !
كيفك وش اخبارك ؟!
ساره بابتسامة خجوله : بخير !
ناظر المكان وسألها باستغراب : مو كنتم ساكنين بالقريه ؟!
دخل نادر على سؤاله وجاوب بسرعه : ايه بس انتقلنا
لقيت هنا شغل افضل !
عبدالله بتأييد :هنا افضل اقرب لكم
واقرب لخالتي لو بغت تزورك !
مطت ساره وهي تدعي بنفسها «الله لايجيب الطريق للي رح تجيبها» !
ارتشف نادر من القهوه وبإبتسامه: اروح اشوف الاكل وش صار عليه ! وطلع وتركهم بالمجلس
قاطعه رنين الجوال رد بهدوء : هلا ......سخيف ايه بعدني عايش .....انقلع مو فاضي لك .. ايه غداي عندهم ....محتر .....طيب طير
وقفل الجوال !
نزلت نظرها بضيق من المكالمه
كان الصوت طالع
صوت عزام جرحها كلامه !
يتفقد عبدالله لذي الدرجه يشوفونها شؤم عليهم !
وللي زاد جرحها لما قال ما تنقرف تأكل عندهم !
لهذي الدرجه يشوفهم قذرين ؟!!!
رفعت نظرها وابتسمت بألم لما نادى عليها : نعم !
استغرب حالها : وش فيك ؟!
هزت كتوفها : ما في شيء !
حس انها سمعت المكالمه ما عرف كيف يرقع ؟!!
سألته بتردد : ما تخاف تموت وتنتهي حياتك بزواجك مني ؟!
تفاجئ من سؤالها وبنفس الوقت حزن عليها لما حس بصوتها نبره حزن يتمنى يلجم لسان الكل عنها حتى ما تحزن او يصيبها ضيق
اخذ نفس يعدل ملامح الضيق للي ظهرت على ملامحه وابتسم لها بمحبه : حياتي بدأت اليوم بعد ما ملكنا !
تفاجأت من إجابته !
كمل وهو يناظرها بإبتسامه : اذا رح تسمعين لكلام الناس رح تتعبين !
طنشي الكلام وعيشي حياتك
والاعمار كلها بيد رب العالمين !
كاتب لكل واحد عمره !
وما احد يموت ناقص عمر صح ؟!
ابتسمت لكلامه وهي تشعر براحه
وهي تحس خلاص بدأت الحياه من اليوم تبتسم لها من جديد !
ما رح تضيع الفرصه ورح تعيش
وتنبسط بكل لحظه !
***
***
***
***
رايحه جايه بالصاله مو مرتاحه
لما سمعت انه عبدالله طاير فيها
وطول اليوم جالس عندهم
وما رجع الا لما اتصل فيه ابو راكان وطلب منه يرجع
وما رجع الا بعد ساعه من اتصاله !
مستحيل تشوفها مبسوطه وتسكت !
بس وش يطلع بيدها !
عقلها مسكر مو قادر يفكر بشيء !
رح تصيبها جلطه اذا ما تصرفت بسرعه !
قررت تتصل بخلف وتطلع حرتها فيه !
**
***
***
***
ابو راكان مو عاجبه الوضع : انت ما تستحي من صباح ربنا وانت جالس عندهم !
عبدالله حاس بوزه : وش فيها ؟!
ابو راكان بغضب : يا ثقل دمك !
دوبك اليوم ملكت عليها وهذا حالك !
وبعدين اخوها يمكن عنده مشاغل
حاشره بالبيت معكم !!!
ابتسم عبدالله بداخله "لو يدري انه طول اليوم جالس معها لوحدنا ونادر ما شفته الا دقائق بعد الاكل ! "
ابو تالا بانتقاد : خلك ثقيل شوي !
ابو ماجد لوى بوزه بسخريه : ما ادري جالس طول يومك عندهم !
ماجد طالعه باستخفاف وهو يكتم ضحكته : الحين يا عمي طول الوقت جالس مع ساره !
وطالع سلمان وانفجروا من الضحك مع بعض !
طالعه عبدالله وهو رافع حاجب انقهر من سخريته وضحكه : بعض ناس محتره لانه للحين ما شاف خطيبته !
ماجد انقهر وناظر ابوه : شفت يبه !
الكل يتشمت فيني !
لمتى هالحال !
خلاص اذا ما شفت خطيبتي وزرتها
وقسم بالله الا اطلقها باكر وما علي من احد !
ابو ماجد ناظر عبدالله وهو يجاكر بماجد بعيونه : خلاص باكر اكلم ابوها
ونروح كلنا ونزورها !
ماجد قفز مو مصدق مثل البزر : صدق يبه !
عبدالله حاس بوزه : بزران اخر زمن !!
**
**
**
**
ام سعود عامله بالبيت طوارئ بعد ما خبرها ابو سعود بزياره اهل ماجد !
عائشه وهي تساعد امها: طيب مو قلتي بعد الثانويه
ام سعود وهي ترتب البيت : ابوك يقول اتصل فيه ابو ماجد واحرجه انهم جايين !
وتعرفين ابوك ما قدر يعترض لانه ابو ماجد عميد الجامعه واكيد يحسب له حساب اذا رفض له طلبه !
عائشه وقلبها يدق بقوه : طيب وش قال لما قلت له اني ادري بموضوع الخطوبه !
ام سعود بلامبالاه : ما قال شيء
اصلا ما توسعت معه بالكلام لانه معصب
ما يبغى الموضوع يتم !
عائشه باحراج وخجل : صعبه اجلس معه وانا اول مره اشوفه !
ام سعود : باكر تتعودين وتصيرين سيف ابو حدين بالدفاع عنه
ولسانك معه مترين !
كل البنات كذا !
عائشه ابتسمت على كلام امها : مو لذي الدرجه !
ام سعود بهم : الله يكون بعوني ابوك مو متقبل الموضوع !
يقول عمره ما كره انسان مثله !
عائشه بضيق وهي مستمره بالترتيب : بابا ما يصير كذا لازم يحاول يتقبله !
قاطعتهم اسماءوهي داخله وهي تردح : انا غريبه ما أحد يخبرني !
ام سعود تأففت ابو سعود نبه عليها اسماء ونهى ما احد يخبرهن !
ما تدري وين عرفت اسماء واكيد الحين نهى خلفها !!!!!
**
**
**
**
دخل البيت وهو ماسك يدها وينادي : يمه يمه !،
استحت ساره وحاولت تسحب يدها
بدون جدوى !
طلعت ام راكان وغصبت الابتسامه : هلا عبدالله !
فلتت ساره يدها وهمست له : ابغى اسلم !
سلمت على ام راكان بفرح
حاولت ام راكان ما تحسسها بشيء !
ورحبت فيها كالعاده !
دخل عزام وناظرهم بانتقاد : ساره هنا !
تقدمت ساره وسلمت عليه بابتسامه !
بارك لها وسألها بحزم : مين جابك ؟!
عبدالله مسك يدها بهدوء وتوجه للكنبه
بعد ما جاس ابتسم بفخر : انا جبتها بعد ما افطرنا بالمطعم !
عزام بحده : وش هذا التسيب ؟!
وين خالي نادر عنك دايره على كيفك ؟!
بلعت ساره ريقها بخوف من نظرات عزام لازم يعكر عليها وما قدرت ترد بحرف واحد
عبدالله باعتراض : هي ترى ما أسمح لك تكلم خطيبتي كذا !
وبعدين اخوانها ما عندهم اعتراض انت وش دخلك !
اعطى ساره نظره قويه مطنش عبدالله
ام راكان تلطف الجو : بعدين معك يا عزام!!!
ساره بتهرب من نظرات عزام وقفت وتناظر ام راكان : اجهز القهوه يا خالتي ؟!
وتحركت للمطبخ حتى تتخلص من نظرات عزام !
بعد ما طلعت عزام بحده : رجاء يا عمي هالحركات اتركها !
بعد ما تتزوج خذها وين ما بغيت !
عبدالله ما عجبه كلامه : عزام لا تتدخ
قاطعهم دخول ابو ماجد جلس وناظرهم باستغراب : وش فيكم !
ام راكان تقفل الموضوع : ولا شيء !
ابو ماجد بتذكير : لا تنسي يمه موعدنا مع الجماعه اليوم !
ام راكان بهدوء : إن شاء الله !
دخلت ساره بالقهوه مبتسمه باحراج
لما شافت ابو ماجد
حطت القهوه وناظرته بخجل : كيف حالك يا عمي!
ابو ماجد ناظرها بتقييم وسرعان ما فتح عيونه بصدمه
***
***
***
انتهى البارت ....انتظروني يوم الجمعه بإذن الله......دمتم بخير
[/size]